Tuy Ðức âk ntil nau kan bu kơl bư trŭnh nau rêh o-ach

Mai Anh| 22/12/2022 15:01

N'qual Tuy Ðức abaơ gĕh 6 xă đah 73 thôn, bon, bản; 23 bu nong rêh ndrel, tâm nĕ bon lan bu nong iê bu nuyh gĕh 5.482 r'năk đah 27.892 bu nuyh, gĕh tâm 43%. Lam n'qual gĕh dăch tât 60.000 hec ta neh bư mir jan ba, r'noh tơm công nghiệp dăch tât 80% lĕ r'ngôch neh tăm ăp ntil tơm.

Tâm ăp năm lĕ lăn, gơi n'hao nau blau pah kan nklaih nau rêh ân bu nong iê bu nuyh, n'qual lĕ n'hao dăng nau kan mbơh ntĭm; pơk 12 jrô ntĭm kĩ thuật tăm ăp ntil tơm, mât rong mpô mpa ân ma 360 r'năk bu nuyh bon lan. Âk r'năk bon lan dơi bu ân hăn khâl bơh tach n'gor bơh nau kan tăm tơm kroch rse hữu cơ, tăm dâu rong ndrŭng, tăm tơm sa trau. Ăp ntil nau kan rong ndrôk, rong sin, rong iăr dơi ndâk pah kan âk tâm bon lan.

Tă bơh ăp ntil prăk sâm kơl n'hao nau wăng sa, bư gĕh âk ndơ kan, pơk huy ndơ kan gơi trŭnh o-ach..., 5 năm lĕ lăn, r'noh r'năk o-ach tâm lam n'qual trŭnh 10,21% du năm. Tâm nĕ, r'năk bon lan bu nong iê bu nuyh tơm trŭnh 13,34% du năm, dơi gĕh rlau nau n'hêl n'qual đă kan. R'noh r'năk o-ach bon lan bu nong iê bu nuyh tơm hôm 28,72%, iê đah r'noh r'năk bon lan bu nong iê bu nuyh lah ndrel lam n'qual 33,88%. Bu nuyh bon lan dơi dŏng ăp ntil dịch vụ. Saơ mpơl ngih wâl gung trong ta ăp bon, bản gĕh âk nau plăch r'gâl mhe, nau rêh rlau nar rlau hao, sâm kơl pah kan Ndơ kan Bri dak bư trŭnh nau rêh o-ach nâp phêt.