Thuận Hạnh nsrôih pah kan kơp di bon lan mhe hao tay

Mai Anh| 30/12/2022 15:36

Xă Thuận Hạnh (Dak N'Soong) gĕh 17,4 km trong n'har bri đah Drôn, gĕh neh ntu huy 7.343 hec ta; tâm nĕ gĕh 11 thôn, 2.617 r'năk sa đah ma rlau 9.800 bu nuyh, 13 bu nong oh nô rêh ndrel. Dơi kơp di bon lan mhe ta năm 2019, Ðảng bộ, n'gâng kan bri dak n'hanh Bu nuyh bon lan ăp bu nong tâm xă nsrôih pah kan tay gơi ndâk njêng n'hanh pah kan dŭt bon lan mhe hao tay ta năm 2025.

Gơi dơi gĕh nau kan aơ, xă Thuận Hạnh nchŭn ăp ntil ndơ gĕh n'hanh msrôih mât, n'hao tay tiêu chí bon lan mhe, tâm nĕ gĕh tiêu chí mrô 20 nkra ntŭk rêh bon lan kiểu mẫu n'hanh tiêu chí mrô 21 mir mẫu - ntŭk tuch tăm mẫu. Tâm nĕ, nchŭn n'hâm suan ndâk njêng nau wăng sa nâp phêt, tâm r'nglăp bơh nau kan tăm ca phê, tiêu gơi bư gĕh ndơ tăm đăp mpăn, dơi kơp di VietGAP, GlobalGAP, 4C, UTZ, Organic; nsu nkra mhe, nkra tay trong hăn tâm bon lan...; ndâk bư nau kan uĕh gơi Bu nuyh bon lan n'chŭn n'hâm suan n'hao nau wăng sa, mât mray đăp mpăn chính trị tâm xă.

Abaơ, gĕh âk tiêu chí jêr tĕng bộ tiêu chí mhe bơh nau kan ndâk njêng bon lan mhe lah: y tế; r'noh bu nuyh pah kan dơi bu ntĭm nau kan; tiêu chí dăp nau kan Ủy ban bon lan xă mra mbơh ntĭm, kuăl jă, rblang ân bu nuyh bon lan gĭt nê nê nau uĕh, nau kh'lay gơi tâm kơl ti, tâm kơl n'hâm suan pah kan ndrel.