 |
Ntâp dak si vắc xin Td ân bu nuyh bon lan ta ntŭk rêh 12, xă Dak R’Măng. Ảnh: Hồng Duyên |
Gơi ngăch n’king, ksiêm ngăch nau ji tưp bạch hầu, mô ân tâm tưp, Thủ tướng đă ăp UBBL ăp n’gor, bon têh tâm Trung ương ntĭm gai ăp n’qual, ăp n’gâng kan, ăp ntŭk kan, phung kan: Mbơh ntĭm, jă đă bu nuyh bon lan pah kan ăp ntil nau kan n’jrăng, n’gang nau ji tưp, ntĭm bu nuyh bon lan lah saơ gĕh nau ji, tât ngăch ta wâl dak si gơi bu khăm, ôp n’hanh ntĭm nau kan săm; ndâk nau kan ksiêm nê nê ăp ntil nô nau, ngăch gĭt, ngăch n’gang mô ân nau ji aơ tâm tưp, gĕh âk tâm bon lan, ngăch săm bu nuyh gĕh nau ji, bu nuyh mô gĕh nau ji gĕh ka man, gơi mô gĕh âk bu nuyh khĭt; uănh nê nê ntŭk gĕh nau ji, ăp bu nuyh way gĕh nau ji; ndâk nau kan ntâp dak si vắc xin ân nŭm ma ăp bu nuyh bon lan, tâm nĕ gĕh ăp n’gor mpeh Tây Nguyên; nŭm prăk rêl, rdeh, dak si dak glê, ndu ndơ dŏng săm bu nuyh gĕh nau ji, pah kan uĕh nau kan ngăch gĭt bu nuyh gĕh nau ji, rdeng bu nuyh gĕh nau ji hăn wâl dak si, săm bu nuyh gĕh nau ji…
* Lơ 7/7, UBBL n’gor Dak Nong lĕ gĕh sam bŭt ndơp ngăch mrô 3378/UBND-KGVX ta nau kan n’hao tay nau n’jrăng, n’gang nau ji tưp bạch hầu n’hanh dơn sŏk săm bu nuyh gĕh nau ji bạch hầu.
UBBL n’gor đă ăp wâl dak si rơm wâl n’king gŭ êng, jrô n’king gŭ êng, rdeh klư, drăp ndơ dŏng săm nau ji, dak si n’hanh ntĭm tay nau kan, n’hao nau blau khăm nau ji, săm nau ji gơi dơn sŏk săm bu nuyh gĕh nau ji jâk. N’gâng kan Y tế ngăch pah kan, hao nau khăm, ngăch gĭt bu nuyh gĕh nau ji, n’king ân gŭ êng, nchueng, săm ân bah ăp ntŭk gĕh nau ji, mô dơi ân nau ji gĕh âk ntŭk tâm bon lan n’hanh gĕh jŏ nau ji. Ăp n’qual pah kan n’hanh ma N’gâng Y tế pơk nau kan ntâp dak si vắc xin n’jrăng nau ji bạch hầu, uốn ván ta ăp ntŭk way gĕh âk nau ji n’hanh n’hao tay ăp ntil nau kan ntâp dak si n’gang nau ji gĕh rlau 95%.
Quốc Sỹ