Tâm mâp dơh dăch n'hanh pah kan ndrel Bu nuyh bon lan Việt Nam - Drôn ta Dak Nong

Mẫn Doanh| 10/11/2022 10:34

Mhau lơ 7/11, ta bon têh Gia Nghĩa, Liên hiệp ăp m'bŭch kan dơh dăch Việt Nam, N'gâng kan Dơh dăch Việt Nam - Drôn, Ủy ban Bon lan n'gor Dak Nong pah kan ndrel ma N'gâng kan Dơh dăch Drôn - Việt Nam ndâk nau kan khâl rlưn, tâm mâp bar đah Phung kan bar bri dak đah bu nuyh bon lan n'hanh ka han kơl n'hâm suan, ăp phung kan chuyên gia, Ka han Mât n'har bri, Ðoàn Druh ndăm n'gor Dak Nong.

Aơ jêng tâ bơh Nau kan Tâm mâp dơh dăch n'hanh pah kan ndrel Bu nuyh bon lan Việt Nam - Drôn tâ V, gơi kah gĭt 55 năm Nar ndâk njêng nau dơh dăch bar đah bri dak Việt Nam - Drôn n'hanh năm dơh dăch Việt Nam - Drôn, Drôn - Việt Nam 2022.

N'hao ăp ntil nau way uĕh bơh bar đah bri dak, bar bu nong, n'gor Dak Nong n'hanh n'gor Mondulkiri lĕ pah kan n'hanh dôl n'hao nau tâm rŏng, dơh dăch yor Ðảng, Chính phủ n'hanh Bu nuyh bon lan bar bri dak ndâk njêng. Ta ăp năm lĕ lăn, nau dơh dăch bar n'gor Dak Nong n'hanh Mondulkiri dơi gĕh âk ntil nau pah kan uĕh tâm nau wăng sa - nau rêh bri bon, đăp mpăn ta nau mât bri dak...

Ta nau pah kan aơ, mpơl măt bu nuyh bon lan n'hanh ka han kơl n'hâm suan, ăp phung kan chuyên gia, Ka han Mât n'har bri, Ðoàn Druh ndăm mbơh hưn nau bên n'hanh nau kan gơi mât mray, n'hao nau tâm r'nglăp, dơh dăch Việt Nam - Drôn ân phung kon se; nau tâm rŏng, tâm r'nglăp n'hanh pah kan ndrel bar đah bri dak bơh nau tâm lơh sŏk nau đăp mpăn bu nong, ndâk njêng n'hanh mât bri dak abaơ...

Dak Nong jêng du n'gor tâm 2 n'gor ndâk Nau kan Tâm mâp dơh dăch n'hanh pah kan ndrel Bu nuyh bon lan Việt Nam - Drôn tâ tâl V

Wa Hồ Văn Mười, Groi Bí thư N'gor ủy, Kô ruanh Ủy ban bon lan n'gor r'nê uĕh nau dơh dăch Việt Nam- Drôn

Wa Vann Phal, Bu nuyh kơl kan bơh Thủ tướng Hun Sen, Groi Kô ruanh N'gâng Dơh dačh Drôn - Việt Nam, Kô ruanh phung kan têh Drôn nkah ăp ntil nau kơl Việt Nam đah Drôn