Mbơh n'jrăng nô nau muih phă bri

Tĕng Ủy ban bon lan n'qual Krông Nô, tâm 10 khay bôk năm, tâm lam n'qual gĕh 13 tâ bu muih phă bri đah r'noh neh bri gĕh bu muih phă dăch tât 5 hec ta. Ðah khay năm 2021, r'noh bu muih phă bri âk rlau 8 tâ n'hanh neh bri gĕh bu muih phă huy rlau 3,2 hec ta.

Ta Dak N'Soong, m'bŭch kan mât bri lĕ saơ n'hanh nhŭp kuh 54 nau tih lâm luật ta 10 khay bôk năm. Ta r'noh aơ, gĕh 33 tâ bu muih phă bri gĕh nau tih bư roh 6,7 hec ta.

Dak Glong gĕh r'noh bu nuyh gĕh nau tih Luật Lâm nghiệp âk ngăn ngên tâm n'gor

Nô nau muih phă bri gĕh âk ngăn ngên tâm n'qual Dak Glong, đah 219 nau tih tĕng Luật Lâm nghiệp tâm 10 khay bôk năm. Ta r'noh aơ, gĕh 173 tâ bu muih phă bri, bư roh gĕh 35 hec ta bri. Tâm nĕ gĕh âk ntŭk bu muih phă bri lah ta ăp công ti, doanh nghiệp dơn mât, chiă bri(150 tâ, bư roh dăch tât 27 hec ta bri).

Tĕng kơp, tâm 11 khay bôk năm 2022, lam n'gor Dak Nong saơ gĕh 440 tâ bu gĕh nau tih Luật Lâm nghiệp. Tâm nĕ, gĕh 308 tâ muih phă bri, bư roh 63 bri. Dak Nong jêng n'gor gĕh nô nau muih phă bri âk tâl 4 tâm bri dak.

Lam n'gor gĕh 308 tâ bu muih phă bri, bư roh 63 hec ta bri tâm 11 khay bôk năm 2022

R'noh bu muih phă bri ta Dak Nong jêng nau mbơh n'jrăng. Tổng cục Lâm nghiệp (Bộ NN-PTNT) lĕ njuăl săm bŭt đă Ủy ban bon lan n'gor Dak Nong r'gâl n'hanh pah kan uĕh tay nau kan mât, chiă bri.

Ủy ban bon lan n'gor Dak Nong đă ăp m'bŭch  kan mât bri n'hao tay nau kan n'kĭng, hăn ksiêm gơi mât uĕh r'noh bri n'hanh neh lâm nghiệp dơi bu jao, ân manh. Ủy ban bon lan n'gor đă ăp m'bŭch kan ndâk nau kan n'king, ndâk nau kan joi nhŭp bu nuyh muih phă bri, ăp ntŭk "gĕh âk bu muih phă bri" gơi ngăch n'gang, nhŭp kuh phung muih phă bri.

Thanh Hà