Ta yăn rlu nti săm bŭt, kon se way tâm jă hăn pâl, hăn ŭm nglau dak, ŭm n'hor dak. Yor nĕ, nô nau bŭk dak âk ngăn. Gĕh âk nô nau bŭk dak yor kon se mpanh ir, ŭch re dak, pâl rlưn khă nĕ khăn păng mô gĕh nau n'jrăng, mô gĕh bu nuyh têh mât. Rlau nĕ, ăp ntŭk gĕh nglau dak, n'hor dak iê bu nuyh rêh, iê bu nuyh găn hăn. Lah gĕh nô nau tât, jŏ mơ dơi tât hăn kuăl bu nuyh kơl nĕ âk kon se mô dơi bu kơl wơt ka lơ jêh rĭ bŭk dak khĭt. Yor nau aơ, ăp me mbő sâm mât, ntĭm sơm, nkah oh kon tâm r'năk n'jrăng nô nau bŭk dak, mô dơi ân kon se pâl êng ta ăp n'hor dak, nglau dak, ntu dak... Ta ăp mpeh gĕh n'hor dak, nglau dak tâm nĕ gĕh ăp ntu ka koai êng gơi n'gân dak tŏ ân ăp ntil tơm tăm, rong ka... he nkah ăp kon se jê mô dơi ŭm, paal ta ntŭk aơ.
 |
Nô nau kon se tâm bon lan mpeh ngai way tâm jă hăn ŭm ntu ka, n'hor dak, nglau dak abaơ âk ngăn, tâm nĕ gĕh tâm yăn rlu nti săm bŭt |
 |
Kon se tâm mpeh bon lan bu nong iê bu nuyh way tât hăn pâl ta ăp nglau dak, ntu ka, n'hor dak,... yor nĕ klăch ngăn gĕh nau tât bŭk dak |
 |
Ntĭm nau re dak ma kon se jêng du ntil nau kan kh'lay sâm kơl kon se n'jrăng nô nau bŭk dak |
H'Mai