Tăm tơm cam Vinh ta Dak Wer
Wăng sa - Ngày đăng : 15:30, 04/11/2021
Bôk năm 2019, che Lý Văn Nam, bu nong Hoa lĕ r'văt tơm cam Vinh (Nghệ An) tăm ta thôn 10, xă Dak Wer (Dak R'lâp). Ta neh 7 sào, che tăm 500 tơm cam Vinh ndrel ma 120 tơm sầu riêng Thái n'hanh 50 tơm play nkroch ntô đung.
Yor gĕh nau bên tăm tơm sa play, jêh tăm tơm cam Vinh, che r'gâl nau mât chăm tĕng trôk nar, tĕng neh ntu tâm xă. Jêh tăm 3 năm, tơm play cam ntơm gĕh play. Tơm play ngăch hao jêng, n'ha ndrêh uĕh, play têh rvil, sa kah. Ðah r'noh tăch ntơm 25.000 - 30.000 r'băn du kí, tơm cam Vinh sâm n'sĭt prăk ma r'năk che. Klăp mĭn lah năm tâl 4, năm tâl 5, tơm play cam gĕh play âk, gĕh pĕ tât 1 - 2 tạ du tơm.
 |
Tơm play cam Vinh dơi che Nam tăm ndrel ma ăp ntil tơm sa play bă bă |
 |
Tơm play ngăch jêng ta neh ntu Dak Wer, tơm play luh âk kao |
 |
Tơm play cam Vinh ntơm gĕh play ta năm tâl 2 n'hanh tâl 3 đah play njŭng, jơk tâm 2 - 3 mlâm play du kí |
Hồ Mai