 |
Ăp ntil nau kan tĕng Nau ntĭm gai bơh Thủ tướng Chính phủ. Đồ họa N.T |
Rlu ăp ntil nau pah kan rbŭn âk rlau 20 bu nuyh ma ka lơ, lah gĕh nau kh'lay ŭch ndâk nau kan gĕh N'gâng kan Ntĭm gai n'jrăng, n'gang nau ji tưp tâm n'gor ân mơ dơi pah kan gơi đăp mpăn nau kan n'jrăng, n'gang nau ji tưp.
Mô dơi rbŭn rlau 10 bu nuyh ma ka lơ bơh tach kông sở, wâl săm bŭt, wâl dak si; gŭ ngai bu nuyh aơ ma bu nuyh ri bơh tach tâm 2 met.
Trŭnh r'noh rdeh rdeng bu nuyh, r'noh bu nuyh ncho rdeh tâm n'gor, tâm nĕ: trŭnh 50% r'noh rdeh rdeng bu nuyh (gĕh rdeh buýt, rdeh taxi, rdeh hợp đồng); trŭnh 50% r'noh bu nuyh ncho du rdeh rdeng bu nuyh.
Lah bu nuyh ntơm bơh Bon têh Hồ Chí Minh sĭt, tât tâm n'gor: đă xét nghiệp RT-PCR ta ăp n'tŭk n'king n'jrăng nau ji tưp, tât ân gŭ êng y tế ta ăp ntŭk gŭ êng tâm ăp n'qual, bon têh ntŭk tât, sĭt. Lah gĕh xét nghiệm âm tính dơi bu ân gŭ êng y tế ta wâl n'hanh xét nghiệm tay RT-PCR tĕng nau n'hêl bơh Bộ Y tế.
 |
Phung pah kan ksiêm bu nuyh tă bơh n'gor bă bă lăp tâm n'gor Dak Nong ta ntŭk n'kĭng n'jrăng nau ji ta Cai Chanh, xă Dak Ru (Dak R'lâp) |
Pah kan mbơh hưn nô nau y tế ma lĕ r'ngôch bu nuyh tâm n'gor. Rlu hăn rbŭn ta wâl chroh, rlu nau rbŭn gĕh rlau 20 bu nuyh ma ka lơ ta ăp wâl brah, wâl chroh, ntŭk bư brah; rlu nau rbŭn pâl rlưn, nau pâl mpât săk jăn, nô nau gĕh âk bu nuyh tâm bon lan, sân chưng play đung n'hanh ăp ntil nau kan têh mô saơ kh'lay; rlu ăp ntil nau rlưn, ăp ntŭk pâl, karaoke, massage, wâl bar, vũ trường.
Ăp ntil wâl pâl game, internet, bida, rạp mpơl phim, ntŭk pâl mpât săk jăn, n'hao dăng n'hâm suan, nau mpât săk jăn, n'hao dăng n'hâm suan săk jăn, ăp ntŭk bư uĕh săk jăn dơi pơk kan, khă nĕ mô dơi rbŭn âk rlau 10 bu nuyh n'hanh pah kan ân di gơi n'jrăng, n'gang nau ji tưp tĕng nau n'hêl.
Ăp wâl tăch drăp, r'văt drăp ndơ, wâl ngêt sa, ntŭk têl nô nau kăl e, ntŭk hăn pâl uĕh bri dak dơi pơk kan khă nĕ lah pah kan ân di gơi đăp mpăn nau n'jrăng, n'gang nau ji tưp, mô dơi rbŭn rlau 20 bu nuyh ma ka lơ. Ăp wâl ngêt sa, wâl hàng, ca phê ân gŭ tâm ngai bu nuyh aơ ma bu nuyh ri (mô dơi rlau 4 bu nuyh du nsưng têh, mô dơi rlau 2 bu nuyh du nsưng jê) n'hanh n'hưch bu nuyh bon lan tăch ndơ ndjôt sĭt ta wâl.
Nau kan tâm nsông, tâm ôp dơi pơk kan khă nĕ mô dơi rbŭn rlau 20 bu nuyh ma ka lơ n'hanh n'jrăng, n'gang nau ji tưp, dơi n'gâng kan y tế, n'qual ksiêm uănh.
N'gâng kan Y tế ksiêm tay, tĕng joi, ân gŭ êng, n'chuĕng, sŏk xét nghiệm ăp bu nuyh dơh dăch ma phung dương tính Covid-19.
Quốc Sỹ