 |
Bí thư N'gor ủy ntĭm gai, kô ruanh ăp n'gâng kan, ăp ntŭk kan dơn kan mât kan bộ, bu nuyh pah kan. Ảnh: Ngô Đồng |
Tât lơ 12/7, Dak Nong gĕh 3 nuyh gĕh nau ji tưp Covid-19 ta ăp n'qual Krông Nô n'hanh Dak R'lâp. Ta bu nuyh gĕh nau ji mrô 26004 tâm bon jê Kiến Ðức, n'qual Dak R'lâp, n'gâng kan Y tế lĕ joi saơ gĕh 27 F1, 180 F2 n'hanh rlau 200 F3. Ðah bu nuyh gĕh nau ji mrô 28474 ta xă Dak Sôr, n'qual Krông Nô lĕ joi saơ gĕh 12 bu nuyh F1, 51 F2 n'hanh dôl ksiêm ăp bu nuyh bă bă; đah bu nuyh gĕh nau ji mhe ta xă Dak Wer, n'qual Dak R'lâp (e hŏ gĕh mrô) abaơ lĕ gĭt saơ gĕh 13 F1 n'hanh dôl dơi bu ksiêm, tĕng joi, trĕng uănh tay ăp bu nuyh bă bă. Tĕng nau mbơh kan nô nau ji tưp Covid-19, Dak Nong abaơ dôl jêng du n'gor "klach gĕh âk nau ji tưp".
Nchŭn nau kan ta nar rbŭn, Bí thư N'gor ủy Ngô Thanh Danh lĕ đă ăp n'gâng kan chính trị n'hanh ăp Bu nuyh tâm bon lan lăp pah kan tĕng nuih n'hâm răp jăp, lĕ n'hâm suan tâm nau pah kan, n'jrăng nê nê nau ji. N'gâng kan bri dak ăp n'qual, ăp n'gâng kan n'hao uĕh nau dơn pah kan gơi n'jrăng, n'gang nau ji tưp. Lah gĕh bu nuyh ji, ăp n'qual mra n'gang, tĕng joi, ksiêm, mô dơi ân tâp tưp âk nau ji tâm bon lan. N'king ân gŭ êng ăp bu nuyh tă bơh Bon têh Hồ Chí Minh sĭt tâm n'gor. N'gâng kan Y tế rơm nŭm bu nuyh pah kan, jrô n'hanh wâl dak si, ndơ dŏng khăm săm nau ji... gơi rơm, ngăch n'king ân gŭ êng ăp bu nuyh sĭt tă bơh Bon têh Hồ Chí Minh.
 |
N'gâng kan Ntĭm gai n'jrăng n'gang nau ji tưp ta bu nuyh n'gor Dak Nong hăn ksiêm tâm n'qual Dak R'lâp. Ảnh: Hồng Duyên |
Bí thư N'gor ủy ntĭm gai, kô ruanh ăp n'gâng kan, ăp ntŭk kan dơn kan mât kan bộ, bu nuyh pah kan, dăp bu nuyh pah kan ân di, n'hưch nau kan trực tuyến. Kô ruanh ndjôt bôk n'qual, ăp ntŭk kan dơn nau tih lah gĕh kan bộ, bu nuyh pah kan gĕh tưp nau ji Covid-19 yor mô klach, mô gĕh n'jrăng. Ăp n'gâng kan, ntŭk kan, phung kan, tĕng nau dơi pah kan, nau dơn kan gơi pah kan ndrel ân uĕh nau kan n'jrăng, n'gang nau ji tưp.
Ủy ban Mặt trận Bri dak n'gor pah kan ndrel ndâk nau kan tâm kơl Prăk rêl, n'gang nau ji tưp Covid-19 tâm n'gor, gơi gĕh prăk dŏng r'văt văc xin n'hanh ndơ dŏng khăm, săm nau ji y tế gơi n'jrăng, n'gang nau ji tưp; n'hao uĕh nuih n'hâm tâm rŏng kon bu nuyh, kơl bu nuyh o-ach, kơl ăp bu nuyh gĕh nau rêh jêr jŏk gĕh nau jêr yor nau ji tưp bư.
Bảo Ngọc